《香港愛情故事》貼地反映現實 噚晚首播獲網民正面評價
ViuTV嘅《全民造星III》掀起全城熱話，相反無綫同時段嘅節目就冇咩人討論。唔知係唔係因為咁嘅關係，無綫將10點半時段變陣，抽起原定節目，改播愛情小品劇《香港愛情故事》，由以往3線劇集變4線劇集。《香港愛情故事》喺噚晚正式出街，想知網民們睇完有咩感受，快啲轆落去睇下啦！
題材貼地有共鳴感
劇集主要講述香港老中青三代人嘅愛情故事，當中仲圍繞唔少人所面對嘅問題，例如搵地方「開房」、為上車死慳死抵、離婚爭公屋、被迫住劏房等等 。噚晚播出嘅第一集就已經俾觀眾感受到土地問題嚴重，真係只有香港人先有共鳴。唔少網民睇完都紛紛留言大讚劇集貼地又寫實，例如「呢套好貼地 好睇過踩過界2同使徒行者3多多聲」、「呢套算幾貼地，帶出下香港個地方問題引下人睇，連屋企都幾真實，同埋起碼有d新面孔，題材算新鮮，警匪醫療劇已經拍到好悶啦」、「終於第一次貼地住細屋上格床，主角不再是住大屋仲有天台。」、「呢套劇應放830，夠貼地，後生仔師奶阿叔都共鳴，1030師奶阿叔好多早訓無睇。」及「用左好多潮語 講野勁貼地 有別於其他既劇」等等。
演員配搭有新鮮感
《香港愛情故事》搵嚟首次擔正男一嘅羅天宇及戲路甚廣嘅龔嘉欣主演，佢哋喺劇中飾一對冇錢買樓嘅苦命情侶Ronny同Katy。除咗佢哋之外，劇集仲有「女神」王敏奕、謝東閔、石修、龔恩慈、白彪及游嘉欣等人主演，唔少網民都話演員配搭新鮮。
白彪連踩4線劇集
資深演員白彪喺劇中飾演退休水電技工陳漢聲，性格非常「大男人」嘅佢與老婆莫少霞（龔恩慈飾）結婚接近30年，對老婆冇禮貌又粗聲粗氣，搞到莫少霞頂唔順，喺生日當日大叫要離婚。網民都睇完佢嘅演出，紛紛大讚白彪演得好神似，完美演繹角色。另外，唔知大家有冇留意近期經常喺劇集見到白彪呢？其實播映中嘅四線劇集都有佢嘅演出，分別係《愛·回家之開心速遞》雷公、《使徒行者3》大輝哥、《踩過界II》陳福全及《香港愛情故事》陳漢聲。
龔嘉欣Carry到女一
2008年簽約無綫嘅龔嘉欣，由配角一步一步做到上女一。今年更被人睇到不一樣嘅龔嘉欣，繼《大醬園》奸詐嘅細么及《殺手》冷酷嘅Dark Angel後，佢今次喺《香港愛情故事》飾演正宗港女Katy，成為今年大熱視后。唔少網民都留言讚佢，例如「龔嘉欣好得！完全Carry到女一，同羅天宇好有火花」、「龔嘉欣 女一唔錯呀」及「龔嘉欣好博」等等。
王敏奕靚女
上年升呢做人妻嘅王敏奕，今次喺劇中飾演反叛、不羈、敢做敢愛嘅自由攝影師陳子欣，與謝東閔及黃子恆有親熱戲。噚晚王敏奕cool爆出場，又與老豆白彪鬧交，唔少網民睇完都大讚佢，例如：「王敏奕好靚女 演技唔錯」、「王敏奕好正」、「王敏奕過咗咁多年都仲覺得佢好靚」及「王敏奕勁正呀」等等。
游嘉欣吸睛獲關注
叫「嘉欣」都係靚女，而喺娛樂圈真係有好多靚女嘉欣，當中包括現年只有20歲嘅游嘉欣（Kayan）。佢喺劇中飾演品學兼優嘅大學女神陳子婷，對同學徐浩楠（徐文浩飾）產生好感，喺噚晚嗰集仲當面拒絕同學Eric（孔德賢飾）嘅表白。有新面孔一班網民們當然有留意到，仲紛紛留言讚佢，例如：「游嘉欣自然夠貼地,易入屋,唔係話即刻捧佢上位,但起碼值得多d演出機會」、「新舊演員都做得好好！估唔到遊嘉欣演戲初哥演技咁自然」、「游游做得幾自然，只有20歲非常有前途。 好過陳曉華一出就做女一，非常生硬。」、「游嘉欣笑得好靚」及「游b笑容好燦爛好陽光喎」等等。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
