串流平台Apple TV+訪談節目 The Me You Can’t See搵到樂壇天后Lady Gaga做嘉賓，細談精神健康話題。Lady Gaga曾經年少時承認被性侵，今次佢就同主持Oprah Winfrey 同英國哈利王子，講述當年慘痛經歷，同埋事後點樣走出陰影。

Lady Gaga憶述19歲嗰年，已經入行嘅佢被監製要求除衫，Gaga拒絕但對方揚言會燒晒佢嘅歌曲，之後監製窮追猛打，Gaga只係呆若木雞。後來Lady Gaga多次被性侵，甚至試過喺自己父母屋外發生，Gaga之後更發現因姦成孕。事件對Gaga帶來巨大創傷，佢試過自困錄音室數以月計，多年後因為身體不適入院，全身疼痛甚至麻木，院方安排心理治療師幫Gaga，佢先發覺嗰種唔舒服嘅感覺，同其中一次被性侵時嘅狀況一樣。

Gaga強調唔想再見到性侵佢嘅人，亦唔會披露對方係邊個。節目入面Lady Gaga透露年青時試過「界手」自殘，即使事發多年，而家佢都仲克服緊心理上創傷，又形容治療過程好似「烏雲蓋頂」一樣。原來Lady Gaga搵專家協助嘅2年時間並冇停工，甚至參與電影《星夢情深》演出同音樂創作。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！