年屆70歲嘅「食神」韜韜（梁文韜）一向以美食家身份聞名，其龐大身形同巨腩更加係佢嘅標誌，曾坦言自己腰圍達48吋，因為工作需要同缺乏運動令身體肥胖，更加患有「三高」。不過近呢兩年，韜韜積極減磅，由高峰325磅減到195磅，身形大縮水。

早前，韜韜就接受香港電台《鏗鏘說》訪問，表示係希望身體健康而減肥：「年紀大，必須拄拐杖才能走路，加上右膝曾受傷，也沒辦法。」而佢喺舊年接受媒體訪問亦曾提到，係最年幼嘅弟弟激發到佢，韜韜弟弟亦屬肥胖一族，2017年某日食飯後突然離世，當年弟弟只係59歲，從而令韜韜下定決心減肥。

喺減肥過程中，韜韜透過運動與改善飲食習慣大幅減磅，每日早上5時起身運動，減少攝取澱粉質。成功減走130磅之後，韜韜指著嘅衫都變得寬鬆，饞嘴習慣雖然戒唔走，但就會揀食物種類：「好多食物都想吃，例如『崩沙腩』，以前吃一大碗，現在吃一、兩件就不再吃了。」

韜韜最近又亮相美食家蔡瀾嘅網上節目《蔡瀾花花世界》介紹美食，不但畀蔡瀾大讚其減肥意志力強勁，一班網民亦留言指韜韜真係清減咗好多，好在唔係因為健康有問題而變瘦，仲表示希望佢身體健康：「滔哥清減佐好多，個樣睇起嚟更加像一個慈眉善目的老爺爺。」、「韜哥絕對有資格做瘦身代言人了！」、「韜哥恭喜你成功減肥，以前睇你節目見你咁肥仲要食咁多嘢，真係驚你會爆血管，現在健康好多。」、「美食當前，都能減肥成功，滔哥真係要教下大家有咩心得。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！