TVB劇集《愛上我的衰神》將於下周一（27日）晚上9點半播出，選角相當新鮮，起用馬貫東、麥美恩、胡鴻鈞及90後新人陳嘉慧（Erica）；講述潘小渝（陳嘉慧飾）擔任「衰神」，與陳北河（胡鴻鈞飾）因一系列意外而相戀嘅故事，呢次更加係25歲陳嘉慧首次擔正做女主角，未知觀眾又會唔會滿意佢表現？

陳嘉慧喺12歲時跟媽媽移居日本並喺當地讀書，外貌精緻嘅佢曾被指與唐詩詠、劉心悠、賈靜雯等女藝人撞樣，不過佢就覺得自己唔夠靚，又認為自己符合唔到「美貌與智慧並重」呢個條件，所以當年無參加香港小姐入行，反而選擇2017年參加藝員訓練班，翌年正式入行，由低做起，例如《溏心風暴3》護士、《BB來了》接待員等大配角，直至2019年飾演《解決師》陳佩慧、《迷網》牛嘉碧等角色加深觀眾注意。TVB同時安排陳嘉慧向主持方面發展，成為《Think Big天地》主持一份子，又拍攝《Ben Sir睇樓團》、《大玩特玩》、《眼睛去旅行》等綜藝節目。

由於喺日本長大，精通日語嘅關係，陳嘉慧自覺有優勢。至於點解唔留喺日本，選擇返香港發展，陳嘉慧就直言自己較任性，中意挑戰，而且香港比日本更有歸屬感。開展演員之路以外，陳嘉慧仲與拍檔投資6位數字喺銅鑼灣開設頭髮護理美容中心成為老闆娘，認真叻女。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！