藝人鄧健泓與老婆石詠莉2013年拍拖並於2017年拉埋天窗，相愛9年向來恩愛，早前佢亮相陳敏之影片頻道，自爆原來早於2007年已對石詠莉心動，更曾經出招調情甚至相約食消夜，惟當時佢正與李施嬅拍拖，雖然未有進一步行動，但佢都直認賤格：「我第一次見佢（石詠莉）係喺《勁歌金曲》，我做完《勁歌》後......呢啲咪賤格囉！我傳訊息flirt（調情）佢。因為我嗰陣有女朋友，我只係flirt佢。我知佢住西貢，嗰度有間麥當勞，我約佢食消夜，佢話『好呀』。但始終有個問題唔係好好，我有女朋友......結果講完就算，因為我驚！堅驚！所以當佢係朋友，07年後無再溝通。」續指至2012年回復單身，偶然聽到石詠莉網上翻唱歌曲，才鼓起勇氣重新聯絡，終修成正果。

雖然鄧健泓都認晒「衰仔」，但此言一出照遭到網民炮轟，紛紛鬧爆「渣男」，惹來大量負評，近日更有網友發現該集片段已神秘下架，懷疑有人「玻璃心」要求將片段消失，對此陳敏之表示係技術上錯誤，好快就會將片段重新上架。