近日環球股市大跌，本地失業率又開始上升，面對此嚴峻形勢想部署儲蓄，最緊要識得「彈出彈入」。
方便跳船最實際
環球股市大減價，正好係趁低吸納好時機，現金多到滿瀉的股神近期就密密出擊。不過我哋呢啲凡人入幾次貨資金就乾塘，較實際做法係趁跌市啟動月供股票攤分成本。
不過現時玩月供股票最大憂慮係份工唔穩陣無錢供。所以最好揀一些方便跳船的月供計劃。例如中銀香港月供股票除了月供門檻低至500港元，更提供市價沽碎股服務，當山窮水盡時都可以沽出未儲滿一手股票套現。
美股由於可以逐股收集，趁跌市每月入些少都達到月供股票效果。例如以約372港元就可以買到一股可口可樂，每個月儲兩股都只係約744港元。而且不少積極吸客的證券行都免存倉費、代收股息費甚至免佣金，大大減省收集美股成本。
求穩陣則可考慮短期定存，雖然近期港元定存息率縮水，不過就勝在保本。怕資金被綁死可選擇短至三個月至半年的定存，息率都有1.3至2.2厘，但這類短期定存往往係要經網上申請且名額有限，想用定存避險就要留心銀行App及網頁了。
短期儲蓄保險平衡風險
假如你手頭資金較充裕，想把部分資金停泊在較平穩的儲蓄工具，可以考慮一下較短期的儲蓄保險。
傳統儲蓄保險產品供款期動輒十年以上，如果要提早退保，可能會損失至少三成保費。短期儲蓄保險優點係供款期約一至兩年就可享五年保障期。儲蓄保險另一賣點係兼具人壽保險功能，假如受保人不幸身故可獲賠償，近來大家都格外關注健康風險，這賣點就更具吸引力。
現時市場上短期儲蓄保險產品，退保靈活度最高係Blue推出的「WeSave定息儲蓄保」，除了賣點保證平均派息達3厘，提早退保更免收費，即使首年退保亦可獲該年保證派息。
對保險公司而言，短期儲蓄保險算係利潤較少產品，因此通常會以期間限定限量發售。由於未來利率走勢易跌難升，較高息的短期儲蓄保險可能買少見少，有興趣的朋友就要積極留意各大保險公司的產品推廣資訊。
