馬賽拍片呻港媒「當我係『大陸妹』」 分享入行經歷唔提同性緋聞艷舞片事件
幾年前回歸內地發展嘅前TVB女藝員馬賽，最近活躍於微博同抖音與網友互動。繼早排回應被網友譏笑係「過氣」藝人「淪為帶貨主播」之後，馬賽早兩日又出咗條片，話要「自己的過去自己來說」。
馬賽喺片中提到近來都有留意TVB藝人嘅網友，透過社交平台問佢做咩唔做TVB而要返內地發展、當年發生過咩事之類嘅問題。馬賽話4年前北上發展之後，喺香港嘅人生的旅程已經告一段落，所以而家唔會點講返起，但係同朋友提起往事就覺得好唏噓，又覺得以前嘅自己同而家嘅佢冇太大關係。
分身不暇實習無著落 轉陣選港姐
呢條片冇咩故事要講，主要係馬賽預告定日後會將過去一啲經歷娓娓道來，但最尾佢話「好慶幸有自媒體，然後我也回到了內地，我也不再懼怕香港媒體的眼光，覺得我是一個『大陸妹』，反正就是可以挺自由的做回自己吧」。
尋日馬賽又出多條片講點解選港姐，佢話因為當時其他同學都有做暑期實習，本來自己安排好去電影公司實習同埋做奧運馬術比賽義工，但係兩樣工作撞晒時間做唔成，後來有一日馬媽媽提議馬賽去選港姐……
入行5年做女一 同性緋聞加艷舞片流出2度被雪藏
後來馬賽喺2008年參加港姐拎到季軍，好快就有劇拍，仲唔駛做茄喱啡。過多一年就已經5套劇出街，再拎埋「飛躍進步女藝員」，上位快過火箭！
不過後來擔正嘅《神探高倫布》劇情被觀眾狠批，收視唔理想。同年11月內地女製作人汪子琦喺微博上載同馬賽歐遊嘅親密照，馬賽否認同性緋聞，但係幾日後，有周刊影到馬賽同汪子琦喺上海錫錫嘅照片，而汪子琦亦同富婆Laura有密切往來，馬賽被指介入做第三者，隨即被TVB「雪藏」2個月。雪咗一個月唔夠，TVB就安排馬賽接受訪問，喊住向公眾道歉。而汪子琦同Laura回應訪問時，先後批評馬賽大話連篇，大爆馬賽母女喺雪藏期間仍然同汪子琦遊埠。
同汪子琦爆出緋聞大約半年後，一條見到馬賽穿著性感內衣跳艷舞嘅片段流出，馬賽翌日見記者承認係片中人。而汪子琦就否認片段由佢流出。
馬賽因為「艷舞片」事件再被TVB雪藏3個月，復工之後人氣不再，只係喺TVB拍多兩套劇，2015年底約滿走人，轉到內地發展，期間認識紀姓男友。2019年1月，馬賽喺社交網站宣布婚訊，同年6月誕下女兒Camellia。
