現年31歲嘅前《東張西望》主持林泳淘（Wingto），日前與拍拖14年初戀男友林卓立拉埋天窗，正式升呢做人妻。林泳淘同老公喺5月29號完成註冊儀式，佢今日亦係社交網上載結婚照並向大家公布已正式成為林太。

早前有指Wingto係奉子成婚，不過佢表示結婚係因為上年同老公先後發生車禍，佢哋去還神時師傅話佢地八字係天作之合，而當時仲係男朋友身份嘅漏口風連婚戒都訂好，但因為疫情一直未寄到黎香港。之後師傅亦好快俾咗兩個日子佢哋，其中一個仲係佢哋拍拖紀念日，真係好橋。Wingto透露本來佢哋計劃喺外地舉行婚禮，但因為疫情關係而改係香港簽紙，但婚禮人數限定20人，佢哋諗賓客名單諗到頭痛。Wingto與老公拍拖14年，經歷過無數風雨，就算無盛大儀式，兩個都一定會繼續甜蜜恩愛。

唔少網民知道喜訊後，紛紛留言祝福佢，例如「恭喜你啊 林太」、「恭喜幸福人妻」、「so sweet!!!!! 恭喜泳淘」、「白頭到老」、「真係勁有緣！amazing ! 一定係命中註定」及「恭喜晒，天作之合」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！