新冠疫情有所紓緩，但係防疫限聚令仲未撤銷，好多活動都未能舉行。有「天下第一關」之稱嘅公關界人物鄭紹康(Francis)，尋日喺IG 出Post分享喺豪華小輪上嘅生日派對，不過就被指違反限聚令，自製「公關災難」。

喺Francis share嘅相入面見到，佢邀請唔少朋友同藝人參加party，當中包括鄭俊弘、何雁詩、鄧佩儀、林奕匡太太李靄璣及傅明憲等等，一班人一齊除口罩影大合照，又分別喺船上嘆世界，十分寫意。但係有facebook專頁就出post質疑有冇違反限聚令。

Francis後來留言解畫「出海本應是開心事，然而這張照片令大家誤會了，要跟朋友們說聲不好意思。這艘船名叫 ”The Wan” 是由天星小輪改裝，船內有足夠空間，在出發前已經再三跟船主和相關單位溝通，再次謝謝大家關心我和我朋友的健康」。

根據限聚令條文， 在公眾地方參加4人以上的羣組聚集即屬違法。而「公眾地方」定義係「公眾人士可以不時進入的地方。即使是私人物業，如果公眾人士可以不時進入，例如食肆、酒吧及戲院等，就會符合公眾地方的定義」。遊艇係咪公眾地方屬於灰色地帶，而去年12月，特首林鄭月娥見記者時就話，港府已經針對私人遊艇活動設立熱線，俾市民舉報出海舉辦嘅懷疑違規私人活動。

至於呢隻船就係由天星小輪改建而成嘅「海上豪宅」The Wan，外籍船主多年前以270萬買入，並花費1600萬改裝成豪華遊艇，今年3月因為船主移民而放售，叫價2100萬。船上空間共10000平方呎，有放映室、浴室、開放式廚房等設備，更裝設海水化淡及太陽能發電系統，能夠自給自足。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！