荷里活近日頻頻傳出影星行為不當事件，先有Will Smith於奧斯卡台上掌摑Chris Rock，事後紛紛被電影公司割蓆停止合作︰依家又傳出老牌影星標梅利（Bill Murray）因為不當行為，令Searchlight Pictures突然叫停新片Being Mortal嘅拍攝！

Being Mortal為喜劇演員Aziz Ansari首部執導喜劇作品，電影改編自小說Being Mortal: Medicine and What Matters in the End，同片有《青蜂俠》、《洋腸派對》諧星Seth Regan參演。據外媒The Hollywood Reporter報導，套戲已經拍咗一半，Searchlight因為接到有關標梅利行為不檢嘅投訴，決定停機調查事件。

Searchlight以及片中主要人物皆以事件調查中不便回應而未有公開詳情，不過就確認事件同標梅利有關。從影50年嘅標梅利，主演多套叫好叫座電影，好似《捉鬼敢死隊》、《迷失東京》等，佢更係「對稱大導」韋斯安德遜（Wes Anderson）嘅御用演員，差唔多套套作品都有佢份，包括近期嘅《法蘭西諸事週報》。

作品不斷加上幕前形象和藹可親，「好人」形象深入民心，其實多年來一直有關於標梅利片場使用暴力、性騷擾等指控。最早喺70年代於Saturday Night Live後台同主持Chevy Chase大打出手； 女星P.J. Soles又公開講過80年代同標梅利拍攝電影《雜牌軍東征》期間，標梅利明知女方已婚，仲晚晚打俾佢要求發生關係！

「標叔」又經常同導演就劇本起衝突，同《衰鬼波士》導演Richard Donner一日炒幾次，同《偷天情緣》導演Harold Ramis大打出手。電影《偷》雖然貴為經典，不過兩人因此冷戰21年再無合作！標梅利仲試過想請假被拒，因而掟咗體型嬌小嘅女製片Laura Ziskin落湖！

同佢合作過嘅演員Richard Dreyfuss形容標梅利為「醉酒惡霸」（drunken Irish bully），被標梅利面貼面大聲羞辱兼成個玻璃煙灰缸車埋嚟！女星Lucy Liu亦証實2000年拍攝《神探俏嬌娃》時被標梅利出言侮辱，用辭非常不堪。當時Lucy Liu剛剛走紅，星力最弱，不過佢慶幸有為自己挺身而出，對抗標梅利！以上事件當時被息事寧人處理，事隔多年先浮上水面。

依家進入woke年代兼追求政治正確，巨星都無特權，出手或者出口傷人隨時斷送演藝生涯！Being Mortal拍咗一半都要叫停，就知形象緊要過製作費！