炎明熹妹妹近照曝光 外貌相似被封「小Gigi」 網民討論區票選比較
炎明熹（Gigi）有意離巢唔續約TVB嘅傳聞傳得熱哄哄，雖然早前播出由佢聲音導航嘅節目《他和她的喵店長2》，但炎明熹直認仲未與TVB續約，現正喺討論階段。炎明熹自細由姑丈姑母一家照顧，與父母及弟妹分隔兩地，僅間中返內地探望家人；昨日（30日），炎明熹分享返內地探訪家人嘅照片，包括與弟弟妹妹嘅合照，一班網民都話佢哋大個咗好多，又指妹妹可愛又靚女，更有網民喺討論區出PO叫大家票選炎明熹靚啲定妹妹靚啲。
炎明熹過往都係透過電話與家人維繫感情，2022年返內地參加《聲生不息》嗰陣就有順便探望家人享受家庭樂，當時佢仲同妹妹開Live，大讚妹妹皮膚好：「佢嘅皮膚就是我當年嘅皮膚，好渴望有咁樣嘅皮膚！」由於妹妹當時與炎明熹一樣都係留齊蔭，所以被網民封為「小Gigi」，又大讚佢好得意。兩年過去，炎明熹昨日（30日）又再PO出多張返內地家嘅照片，寫道：「時間飛逝，每次返嚟都想食呢間冰糖葫蘆，雖然唔關咩事、同細妹嘅合照，果然有要求金同細佬的書枱合照、Yeah, 同細佬合照、強壯的三一」，從照片所見，炎明熹妹妹比起兩年前個樣大咗好多，亦由齊蔭變成與炎明熹同款瀏海，十足餅印，網民就留言激讚炎明熹妹妹：「阿妹好靚女啊」、「妹妹同Gi一樣咁靚女」、「妹妹靚咗好多」、「女大十八變，妹妹不經不覺已長大了很多，她已變成一位美人兒，與姐姐互相輝映！」等等；又有網民喺討論區出PO票選佢兩姐妹邊個靚女啲，截至31日早上10時，妹妹以55票對炎明熹45票稍稍勝出。
