【東方日報專訊】藝人麥長青昨日自爆年輕時，因拍攝一場被對手打的戲，被打到耳仔流血，直至近年，他間中會無故頭暈，醫生診斷後問他頭部是否曾受猛力撞擊，才想起或與當年中拳有關，又大爆打他的是一位Model出身的藝員！
麥長青（麥包）昨日出席關注聽覺活動時自爆：「其實我左邊耳仔聽得唔係幾好，因為入行初期拍嘢，有場戲講我被對手壓喺地，兜耳仔打埋去，打到我耳仔流血，打我嘅係位Model出身嘅藝員，佢事先都講明唔識就力，係個武指要求佢真打，出事之後個武指叫我唔好搞大件事，我懷疑就係嗰次搞到我聽力受損！」
麥包又指很多人說他蠢：「但嗰時我後生，覺得冇乜嘢，後來年紀大有時會見暈，醫生問我頭部係咪曾受過撞擊，我諗嚟諗去都冇，唯一諗到就係當年嗰拳！」
後生要識得錫身
其後記者再追問麥包誰是「兇手」，他重申：「其實唔關個Model事，係個武指要求佢打，我講呢件事唔係要追究啲乜，係想大家後生時好好咁保養自己，大家細時唔識得錫身，到真係老時有事就太遲。」
保名譽追討損失
此外，麥包妻子林孜年前與友人夾份炒賣iPhone 6被騙，案中被告日前被判監七年，麥包說：「事件中損失咗四百萬，攞唔番嘞！當然係個好大教訓，但有位女士誤會我同太太喺呢件事係有份，損害我哋名譽，搞到有收數佬上門、又去TVB追數，我太太仲精神緊張到瞓唔好，依家呢單案法庭判咗，下一步輪到我去追討呢位女士對我名譽損害造成嘅損失！」
文：影視組
