日司機發文「希望年輕人坐優先座？」5個日本坐車迷思
對於地鐵的優先座，不少年輕人都避之則吉，一陣比人影相拍片放上網公審就慘了。其實唔單止香港人，日本人都一樣。早前日本一名40多歲的巴士司機在Twitter發文表示，其實優先座並不是老人或殘障者先可以坐，只是如果有需要的人出現，大家將位子讓返出來即可。他表示，在他負責駕駛的巴士上有太多優先座，令好多「不敢坐優先座」的乘客全都站著，卻有一堆位子空著的奇怪現象。
事實上，每個地方都有自己一套搭車的潛規則，去旅行當然最好就跟隨當地人風俗，避免影響他人。香港人旅遊熱點日本，坐車時又有咩「潛規則」呢？以下5個迷思大家又知唔知呢？
1. 讓座等於無禮貌？
讓坐是一種美德，但係日本讓坐不一定代表有禮貌，有人話部分日本老人好玻璃心，讓座比佢等於落佢面，所以大家可以低調地讓座，不一定要講出聲。
2. 可否食野？
坐車時可唔可以進食，相信係好多人的問題。最好就適當地吃東西果腹，唔好大魚大肉，亦唔好食濃味食物，最重要的是保持地方清潔。
3. 車廂內可否化妝？
日本車廂內見到不少女性化妝，即係可以車上化妝？其實最好就避免在車廂內化妝，畢竟車搖晃不停，陣間唔小心跌曬啲化妝品就唔好啦。
4. 扶手電梯企左定右？
關東地區習慣右企左行，而關西地區的大阪則是習慣站左邊，至於京都則左右站的人都有，唯有睇下前面個位企邊啦！
5. 唔講得電話，咁講唔講得野？
有人會問係日本坐車唔講得電話，咁講唔講得野？係可以講野，但注意聲浪不要太大，避免影響其他人。
