網民熱話:食環外判工執紙皮 網民不屑拍照公審
香港不少長者晚年仍要工作,否則難以生活糊口,然而有人似乎對他們也難帶多一點包容。「呢位食環阿嬸霸住條路倒啲水落紙皮…」有網民今日(27日)在網上貼文並拍照投訴,指上水石湖墟有食環外判女工疑在馬路上處理執拾紙皮,除霸佔了路面,而「攪到周圍濕晒」,質疑當中或有人收錢做「私人嘢」。然而網民卻未有認同其公審,反斥他欠缺同理心:「啲水落咗地下會乾㗎,好心你啦,好搞唔搞搞個阿婆,人哋想搞多個錢啫,咁又關你事呀?」
網民Kit Wong今日在網上張貼影片及相片,投訴一名穿着食環署外判工制服的女工,疑每晚也在上水當值時處理紙皮「私務」。從影片所見,當時女工正在電單車泊位旁整理收集得來的紙皮,她「烏低身」將一張一張紙皮疊好,再用繩紮好留來變賣。
可惜女工自力更生並未得到該網民認同,更反指她行為有問題:「每晚約8點半,喺上水石湖墟遊樂場側,呢位食環阿嬸霸住條路倒啲水落紙皮,然後準備拎去賣,仲要攪到周圍濕晒, 究竟佢係唔係收緊政府人工而做緊私人嘢呢?」其中一張相片可見,當時手持紙皮、戴上口罩的女工,發現網民正在拍照,樣子亦顯得相當無奈。
然而貼文者的公審得不到網民的認同,更反被大量網民圍插,指他公審無理,並用粗口狠插他:「關你x事咩,咁x個人恰x個婆仔,人哋用自己雙手搵錢有錯咩?」更有人擔心因貼文者無理公審投訴,更有可能連累女工被辭退而生計不保。
網民有話說
FiRo Chy :執下紙皮撈啲下欄啫,關你x事咩,無佢哋執變到一街都係呀,之前停收廢紙都試過啦!一方面係清理緊街道,另一方面為環保出緊力。用下腦諗下啦!
Leung Chi Kit:大佬,你覺得班清潔工人真係攞到最低工資份人工呀!啲無良清潔公司左扣右扣班員工錢,扣完都唔知有無7千個月,醒下啦!
Aries Hang:你睇留言搵唔搵到有人撐你?
Setong An:人哋得最低工資要執紙皮幫補下都要畀你公審。