楊明顧住「煲粥」 冷落莊思明
【東方日報專訊】藝人楊明與女友莊思明（Lisa）經常出雙入對，雖然早前楊明與龔嘉欣赴英國出席好友陳智燊及宋熙年的婚禮鬧出小風波，但仍無損Lisa與男友的感情，兩人日前又孖公仔現身中環。當晚8時許，楊明與穿熱褲晒長腿的Lisa相約了好友傅明憲、歌手劉晨芝及韋家雄等晚膳，期間頻頻舉杯暢飲，嘻嘻哈哈傾唔停，見楊明對女友照顧有加，不時為Lisa斟茶遞水。一行人醫肚後在餐廳門外影合照，心情大靚的Lisa自拍時玩到嘟嘴又舉V。
一行人之後埋單離開，並步往附近街頭取車。楊明與Lisa本來肩並肩而行，其後卻只顧講電話，被冷落的Lisa惟有與傅明憲邊行邊傾，等到男友講完電話後立即「合體」，雙雙步往乘車。
