黃美棋返TVB恨演臥底 林頴彤簽星夢獻Sing

【東方日報專訊】兩位童星出身的女藝人林頴彤（Bella）及黃美棋都是觀眾細細個睇到佢大，最近二人事業均有新動向，Bella昨日宣布加盟星夢娛樂，踩入樂壇做歌手唱劇集歌，而美棋則回歸無綫，日前更識做地帶住「大明猩」玩Live重遊電視城！

24歲的林頴彤及27歲的黃美棋同是童星出身，Bella 10歲時拍攝亞視劇《萬家燈火》，長大後則加入無綫，去年憑劇集《城寨英雄》慘爆的「鑫鑫」一角人氣上升，昨日她在網絡平台宣布將加盟星夢娛樂，與何雁詩、菊梓喬、胡鴻鈞等做同門，除了繼續拍劇及綜藝節目，更有機會做歌手，她接受本報訪問時難掩喜悅之情，感激星夢老闆何哲圖（Herman）給予機會追夢，她說：「好開心！我會用謙卑嘅心態去做得更好，唔好辜負Herman，其實我一直尋覓緊夢想，我今年10月會25歲，係人生轉捩點，終於搵到個方向，令當初加入TVB團火再次燃燒！」問對歌藝可有信心？她表示最近演出音樂劇，有跟專業老師學唱歌：「知道星夢好多唱得之人，所以我會更努力，歌方面仲揀緊，遲啲公布。（有冇信心上位做一姐？）嘩！唔會咁諗，師姐Jinny（吳若希）即將返嚟，我嘅野心唔喺地位上，係要做好每件工作。」

開Live遊電視城

至於5歲已開始拍無綫劇及電影的黃美棋，曾拍過《刑事偵緝檔案》、《帝女花》及《陀槍師姐IV》等劇集，形象早已「入晒屋」，最近她再簽約無綫，日前更應big big channel邀請返TVB電視城開Live，她說：「感覺既熟識又陌生，好多嘢一樣，但又多咗好多新嘢！開頭都驚觀眾唔記得我，但我提起拍過啲舊劇集，大家都答到，仲話好希望我可以拍劇，第一個Live有六千幾人睇，好開心呀！」講到工作計劃，她會先參與拍攝旅遊節目，但最希望是拍劇：「最想做打女，覺得演臥底好型，好似《使徒行者》佘詩曼咁，希望大家發現我都型得起，當然如果叫我做啲阿妹角色都冇問題。」

文：影視組