【Yahoo 新聞報道】立法會快將踏入「暑假」，會議都趁休會前密鑼緊鼓進行。昨日（12 日）立法會會議長近 8 小時，主席梁君彥就曾經因事行開，由內務委員會副主席馬逢國「頂更」坐上主席位置。但去到新思維狄志遠發言完畢嘅時候，佢冇按慣例叫下位發言議員嘅名稱，結果全場 dead air 幾秒，令人懷疑佢喺上面瞓著覺喎。

睇返片段，馬逢國喺會議差不多最後嘅時間頂替梁君彥。喺佢坐上去大概 20 分鐘嘅時候，狄志遠就完成關於提高亂拋垃圾同埋阻街定額罰款嘅發言，鏡頭即刻轉返去主席位，就見到馬逢國合埋眼咁坐喺度。之後畫面轉返 wide shot，坐喺馬逢國身旁的立法會秘書有所動作，嘗試嗌「主席、主席、主席」；之後秘書轉嗌「馬生」，馬逢國就醒一醒神，叫下位發言議員，勞聯林振昇個名喇。馬逢國喺主席位坐咗大概一個鐘，梁君彥就返到主席位。

馬逢國都有解釋返自己當時咩事。佢就話自己唔係瞓覺，只係「瞇埋隻眼」，當時一直清醒，因為秘書一提醒，佢就立即講得出林振昇個名。佢並且提到自己前一晚瞓得唔好，而且飯氣攻心咁話。

翻查資料，原來去年 12 月 7 日馬逢國都曾經「頂更」坐上主席位，又係被人捉到佢「閉目」；佢當時又係話自己瞓得唔好。唔知道大家畀唔畀到建議佢，令到佢可以改善睡眠質素呢？