林作留學遭欺凌：個樣生成咁，整定！
查看相片
【東方日報專訊】前大律師林作自爆因「樣」問題，在英國求學時遭欺凌，除了寸他是「Chink（中國佬）」外，又踩他英語差，但卻激發他學好外語，令他追到不少精通英語的女友。他又揶揄曾有意賣樓的母親一時一樣，近日頻頻出動睇樓，似想再入市。
昨日林作和孖仔組合Soler出席英語能力座談會，於牛津大學畢業的林作，自爆在英國讀書時遭外籍人士由其樣貌開始踩，慘遭侮辱為「Chink」！他說：「個樣生成咁，整定嘅！寸我呢樣嗰樣，印象最深係外國人特別鍾意話我啲英文。」
舊愛全部英文好
不過愈挫愈強的林作相當爭氣，被攻擊時會「完美還拖」，他表示：「我應對得幾好，會為自己站起來回敬佢哋，佢哋啲英文都唔係真係好得，令我好有動力完美化自己啲英文。」提到找個說英語叻的女友可「事半功倍」，林作認同此說法，故過往的女友全是英語了得的香港人：「講嘢半中半英，用英文溝通嘅機會都好多。」他自言不時上網看英語片及日本片，喜歡英國及日本文化，但不太受韓風影響。
揶揄阿媽一時一樣
林作又指母親有意賣樓欲減輕負擔，似有意大屋搬細屋：「佢密密睇樓，我陪過睇一、兩次，地產經紀界應該知道，但佢諗緊乜我就唔知，女人心好難捉摸，所以盡量唔捉摸，由佢啦，要返屋企嘅時候，我相信佢會返。」並直言兩母子對部分樓盤極為心動：「唔睇唔知世界咁大，不過我冇任何決策權。」又踢爆媽咪可能買比現時細的單位住。問到是否跟媽媽同住，他不怕激嬲媽咪說：「我唔知佢諗咩，一時一樣。」
同場的Soler認為學語言最重要放鬆和開心：「我哋喺意大利日日都要講意大利文，就算講錯，人哋都會聽，唔會笑我哋，所以好快學到。」
文：音樂組
