【Now Sports】今日係決賽周睇波大日子，皆因英格蘭對伊朗嘅B組賽，係三獅喺整個決賽周唯一「食正」我哋黃金時段，係啱啱食完或者仲食緊飯嘅9點鐘開波。機會只此一次，約咗人睇波未？
撰文：球十三係嘅，家陣香港球迷對英格蘭嘅熱熾，未必及得上以前有碧咸、奧雲、雙「特」嘅年代，但都係嗰句，大家始終追睇英超多年，熟口熟面點都有親切感，無論想撐或者想踩都肯定想睇，今晚仲連熱播嘅《繩角》都讓路，大師兄袁天就場拳要等明晚至追。記得上屆，十三都寫過類似內容，英軍對巴拿馬係整個賽事唯一喺我哋黃金時間開波，結果英軍冇令人失望炒人六個一皮，哈利簡尼戴帽，奠定最後成為賽事神射手。

不過，伊朗並唔係巴拿馬。

伊朗係亞洲一哥，戰力強橫水準穩定，同樣來自西亞，斷估唔似噚晚卡塔爾出閘脫腳咁失威。今日我哋會出一篇伊朗世盃威水戰記，同大家重溫隊波喺世盃不乏佳作。英格蘭係咪坐定笠六，或者贏得輕鬆，睇過至知。想加深認識伊朗呢個國家，今日段《世盃見聞錄》應該滿足到看官。

夜啲輪到荷蘭登場，闊別4年再見橙軍，對手係冇咗沙迪奧文尼嘅塞內加爾。想睇荷蘭，同樣想知冇咗文尼之後，邊個為塞軍孭重飛。至於凌晨由美國對威爾斯，一早度定段「美國隊長」佩利錫大戰加利夫巴爾，威爾斯闊別決賽周60幾年，都想睇吓「紅龍」有冇能力張牙舞爪。

今日賽序
【世界盃】英格蘭VS伊朗
Now TV 618台21/11 21:00直播
Now TV 616台4K直播
【世界盃】塞內加爾VS荷蘭
Now TV 618台22/11 00:00直播
Now TV 616台4K直播
【世界盃】美國VS威爾斯
Now TV 618台22/11 03:00直播
Now TV 616台4K直播

全部Now E 同步直播