馮盈盈與江嘉敏去年因「富豪船P」事件決裂，近期卻被無綫安排在節目中「合體」。昨日她們出席記者會，受訪期間盈盈辯稱要補妝，要對方呆等，之後嘉敏稱盈盈是「師姐」時，盈盈即「落閘」表示受唔起！

馮盈盈、江嘉敏、劉佩玥、賴慰玲及張振朗，昨日到將軍澳電視城出席無綫節目《解構心機女》記者會。江嘉敏只晒腿上陣，自然被微晒事業線的盈盈搶鏡。2人表面相敬如賓，並強調從來沒有不和，更大方合照，但嘴巴最誠實，忍唔住互窒！

冇諗過推Job

受訪時，盈盈「擺款」補妝，要嘉敏久等。問到是否「破冰」？盈盈說：「係走冰先啱，講緊佢首次做主持，所以請佢飲珍珠奶茶打氣。（有冇諗過唔接節目？）冇考慮過有工作唔接，節目好有趣，好期待同興奮。」嘉敏則表示除非工作有裸露成分，才會不接。

提到她們的「世紀合照」被網民瘋狂P圖，問嘉敏被P成「圓潤版」可感傷害？她笑言：「邊個P肥我先？你講邊張相先？又唔知邊個P肥我喎？冇咩傷害到我，我噸位夠，打風都吹唔郁。」盈盈則說：「張相係助手影，我覺得只係大家編輯風格唔同，亦從來冇講過啲相冇P圖，不過個底係最緊要，今朝6點半去咗跑步去水腫。」期間嘉敏擦錯鞋嗌「師姐」，盈盈不領情說：「唔好嗌我師姐，我哋同年o架！你14年入行，我仲讀緊大學，我叫番你做師姐先啱，你唔好再嗌我師姐，我受唔起！」

賴慰玲變「潤滑劑」

另外，節目主持之一的賴慰玲笑言是盈盈與嘉敏之間的「潤滑劑」，確保節目順利進行。至於嘉賓張振朗被問上節目後，可會更加了解心機女？他說：「可能我個人比較單純，畀人『心機』咗都唔知，冇所謂啦！」