(綜合報道)(星島日報報道)中國官場有句名言——屁股決定思維。其實，何止官場？無論商場、政圈、傳媒……皆如是。嘻嘻嘻，請大家睇睇電視廣播就知。世事幾怪雞都有，現今坐鎮TVB決策層的，包括老總李寶安、顧問鄺凱迎、節目總監余詠珊……等等，唉，原來全部亞洲電視前領導層。請大家翻查記錄，上世紀九十年代，佢哋如何攻擊「電視霸權」TVB？尤其無記的「音樂政策」。
不過，唉，一到角色逆轉，立即出現「屁股決定思維」現象，各人當然要打倒昨日的我，為TVB政策及股東利益作守護者啦，正常。
「無綫霸權」有N種，其中多年來最強悍一項，為壟斷樂壇，任何唱片公司順我者生、逆我者死，誰不肯低低地躀鋪接受可恥待遇簽約，就咪使旨意出現TVB。係呀，我大晒，版權稅更加唔畀，食到盡，吹乒乓乎？鬼叫我無記獨霸電視武林咩！呢項非常不公平音樂政策，曾經令大部分唱片公司及歌星死死氣低頭硬啃。
不過，終於因唱片事業陷低潮，加內地市場砰砰聲開放，無記音樂節目一沉不起，《勁歌金曲》更名存實亡。喂，商場最現實，唱片公司及歌星為乜要再畀你恰到上心口仍啞忍呢？昔日有參與制定音樂政策者包括吳雨，加入英皇娛樂揸Fit後，又是「屁股決定思維」，與無記關係決裂。
喂，咁搞法，個《二○一四勁歌金曲頒獎禮》，邊仲有得搞？難道由TVB藝員扮歌星，又或由無記子公司「星夢」班歌手吞晒所有獎？講下都知荒謬絕倫啦。哈哈哈，終於出現一個半世紀未見過怪現象——無綫電視認低威，打倒自己。
首先，將綁死歌手制度取消，唔簽約都可亮相攞獎。其次，更低聲下氣要求各大唱片公司攜手「推動樂壇」，畀面派歌手出席頒獎禮。
世界輪流轉，早知今日，何必死命稱霸？
曾智華
(阿碌開咪)
專欄
