【十三短打】簡尼黑，定拜仁黑？

【Now Sports】拜仁慕尼黑12年嚟首次無冠，哈利簡尼「適逢其會」，唔知係佢帶埋黑氣過檔，拜仁慕尼黑真心變拜仁慕尼「黑」，定係佢上錯賊船，總之冇冠軍命就係冇冠軍命。今場波，霎時間想起拜仁1999年被曼聯反勝一幕，睇見簡尼，就諗起馬圖斯。
撰文：球十三哈利簡尼（Harry Kane）舊年離開母會熱刺，想攞冠軍嘛，諗住拜仁係德甲長期擂台躉，以為冇走雞，點知隊波唔爭氣，又殺出一隊癲狂嘅利華古遜，衛冕失敗。嚟到歐聯，作客明明守得好仲先入波以為得米，點知之前連番神救嘅紐亞關鍵時刻至失守，到補時慘被反勝。

就係咁，拜仁錄得自2011/12年球季以嚟，首次冇錦標落袋；而對於簡尼，一個射手單季射入超過40球，竟然攞唔到任何一個錦標，難度超高。

話說簡尼被換走冇耐，拜仁就被扳平而補時輸埋。十三唔想，亦冇資格馬後砲評論杜曹換走佢嘅決定，只係諗起拜仁咁輸法有啲似1999年決賽遭曼聯反勝。我又諗起馬圖斯，同今次簡尼一樣，被換走冇耐喺場邊眼白白睇住隊波由贏變輸，慘情。

賽前話簡尼同比寧咸總有一個英兵進軍溫布萊，兩個同樣係今季轉倉兵、兩個一樣踢得出色，之但係人哋贏完西甲仲可以喺溫布萊倒戈對多蒙特爭歐聯獎盃。

同人唔同命。

撰文：球十三
足球迷叫第十二人，冇偏愛，冷眼旁觀係十三。