林嘉欣溫馨住家飯預埋電燈膽
由林嘉欣、劉青雲、張家輝和袁詠儀（靚靚）合演的英皇新片《廉政風雲 煙幕》票房勁收2,500萬，適逢昨天情人節，一班演員開心「冧滋滋」過節，其中嘉欣、青雲、靚靚跟另一半食飯慶祝，而視母如情人的何遠東則和媽咪撐枱腳，一樣溫馨！
英皇新片《廉政風雲 煙幕》中的主角林嘉欣、劉青雲、張家輝和袁詠儀等，向來與另一半相處甜蜜，昨日是一年一度的情人節，大節當前加上《廉》片票房大收，至昨晚10時票房累積達25,001,326元，人人更加喜上眉梢。
青雲簡單吔餐飯
有老公袁劍偉及兩名女兒的嘉欣，笑言日日都是情人節，故不會特別慶祝：「我都有叫老公唔好送花，因為情人節啲花好貴，又唔捨得擺低啲女，都係喺屋企食飯。」至於結婚多年都勁Sweet的劉青雲和老婆郭藹明，大節當前亦未有大事慶祝，昨天有工作在身的青雲說：「會抽時間食餐飯，簡簡單單就好。」而與張智霖（Chilam）結婚多年的袁詠儀，今個情人節則以「普通」方式去慶祝，她說：「同幾Pair齊齊打邊爐，大家都老夫老妻，都係打吓邊爐、食吓飯，每年都冇乜特別慶祝。老公話每一日都係情人節，所以最特別嘅情人節就係好普通咁過！」
吳岱融上山修煉
在《廉》片中演廉署調查員的何遠東，昨日則與他最愛的女人共度：「我會貫徹電影中嘅宅男角色『文仔』，同暫時係我最心愛嘅女人——媽媽慶祝情人節。（有冇難忘情人節？）啱啱出嚟做嘢，冇咩錢，去茶餐廳鋸扒，再食一個簡單嘅心太軟，心意補救一切，冇咩錢慶祝都可以好快樂。」戲中演律師的吳岱融昨日與老婆鍾淑慧上沉香山修煉，慶祝情人節兼賀結婚23周年。
現實中已私有化「視后」李佳芯的陳炳銓，片中飾演司機，由於昨日要開工，只能與佳芯食餐飯，問到可有難忘情人節？他說：「難忘往往係不經意，唔一定喺特定日子，所以每日都可能會出現，情人節反而多數簡簡單單度過。」而去年與藝人余香凝分手的陳家樂，未有情人一樣有節目：「最難忘係年年情人節都去一間餐廳食雞煲，依家冇拍拖，就約埋啲單身嘅朋友去睇戲食飯。」
