2014年港姐季軍何艷娟（Katherine）喺2018年爆出爺孫戀，與大40歲兼擁有30億身家嘅澳博高層吳志誠結婚，升呢做闊太，不過呢段關係喺8個月後便宣告結束。當時有指回復單身嘅何艷娟收到3億贍養費，所以佢不愁衣食住行，喺無綫做藝員都係賺錢買花戴。日前佢出席藝術展時透露已經約滿離巢無綫，並打算休息幾個月至半年。

現年30歲嘅何艷娟嚟自北京，畢業於港大法律系，喺2014年參選港姐，獲得季軍後便加入無綫，不過入行以來發展平平，演出機會唔多，最為人記得嘅係《宮心計2深宮計》飾演司珍房女史鶯鶯及《愛·回家之開心速遞》飾演白天娥大女龍作蜜Vivian。雖然何艷娟已經離巢，不過佢就話平時都有同《愛‧回家之開心速遞》演員聯絡，每一次見到佢哋都好有家嘅感覺，所以都好有興趣再拍劇。

至於感情生活方面，何艷娟情史多多，可以喺一年之間又離婚又新戀情，男友更越嚟越有米，不過佢被傳媒追問時都否認，仲強調自己係單身。

另外，何艷娟亦透露自己由6歲開始學畫畫，及鋼琴學到8級，佢好想趁機會重拾返對畫畫同彈鋼琴嘅興趣，因為佢覺得人生有好多嘢要學，而暫時停工可以學唔同嘅嘢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！