陳鍵鋒曬廚師制服自拍透露完成培訓 周慧敏留言：你係唔係要十項全能

46歲陳鍵鋒曾被TVB力捧，為「奧運六星」之一，亦與林峯、馬國明、黃宗澤、吳卓羲成為公認嘅「五小生」，曾出演《衝上雲霄》、《律政新人王》系列、《學警雄心》系列、《少年四大名捕》等經典劇集，2010年約滿TVB轉攻內地發展，參與多套電影和網絡電影拍攝，因飾演古裝劇《美人心計》而被封「史上最帥皇帝」。不過其後有指陳鍵鋒因發現腦部天生缺少一條血管而淡出娛樂圈，又因2021年捲入一名男士西貢學潛水溺斃事件中，被指當時嘅教練就係陳鍵鋒，生活變得愈來愈低調。

陳鍵鋒繼2022年分享過自拍照，今年5月罕有地分享自拍照，染有一頭金髮嘅佢穿上黑色外套及戴上太陽眼鏡自信地對鏡自拍，令網民大感驚喜。近日，陳鍵鋒又再PO出著上廚師制服嘅自拍照，原來佢遠赴泰國跟著名廚師阿蘭•杜卡斯 (Alain Ducasse)領軍嘅團隊學烹飪，透露已完成接近100小時嘅培訓，唔少網民都留言恭喜陳鍵鋒成為廚師。陳鍵鋒除咗出名五官標緻，才華技能亦相當多，擁有獨木舟、紅十字會聾人手語、幼兒護理、潛水教練證等幾十張證書，連周慧敏都留言︰「你係唔係要十項全能？」