來自馬來西亞、現年54歲的張慧儀形象性感火辣，至今身材樣貌仍保養得宜，但歷年來卻情路坎坷，繼被《真情》演員盧慶輝在無預警下狠飛，又曾遭「拉丁舞王」未婚夫霍紹裘家暴，當年她被打後報警，更登上港聞版頭版。張慧儀早前在鍾慧冰網台節目《冰姐的花樣人生》受訪時，罕有重提當年被打情況，而事件正好是契機，讓她可以宣布婚事告吹。

張慧儀直言情路不順，與自己看人的眼光有關，她曾跟《真情》同劇演員盧慶輝拍拖，但卻突然「被分手」，對方完全沒有解釋，令她飽受情傷。其後因熱愛跳舞而遇上「拉丁舞王」霍紹裘，她憶述當時「後生、激情，見到佢好識跳舞，一下子沉淪咗」，完全沒有想過對方是否適合自己，交往不久便宣布將會結婚，「但公布咗無耐之後，發現對方唔係一個幾適合我嘅人，我唔想嫁畀佢，但唔點處理，因為通晒天」。

張慧儀指當年結婚環節都得到贊助，但因2003年香港爆發沙士，婚事因應疫情而暫緩，她當時已知道不會跟眼前人結婚，兩人商議時，「由討論到辯論，再繼而動武」。

張慧儀重組當天被打情況，冷靜地憶述：「好記得嗰日佢一郁手，第二朝我係有一部電影開鏡拜神，我仲係女主角嚟！佢一打我之後，我即刻撻咗落地下，感覺有啲嘢流咗出嚟，一定係血啦，流鼻血啦！跟住呢度（眼部）腫咗、瘀咗，咁我第二日點算呢？我咁嘅狀態唔可以開工，如果冇一個理由突然間唔出現，我喺呢個圈就玩完㗎喇喎！你甩底吖嘛！」

雖然捱打，但張慧儀更肯定自己不會結婚的想法：「咁好啦，跟住我把心一橫，呢個都係一個契機，我宣布我唔結婚喇，但係我冇諗過個後果，我報警，咁就搞到好大件事，就係呢件事，畀人生上咗第一次港聞版！我到而家都好記得港聞嗰張相，戴住口罩、戴住帽，戴住眼鏡，你仲見到依度（眼部）瘀瘀黑黑㗎，嘩，嗰剎那真係我唔知點講。」

她形容事件對她是很大很大的打擊，當她外出見到別人在交頭接耳時，已經覺得對方是在談論自己，「咁樣係好弊㗎，如果再咁樣，我精神係會唔得㗎，嗰陣我就同自己講，我需要放一個悠長嘅假期」，於是就去了北京長住。