解讀 | 戴納情歸車路士

葉士域治向多間有意收購戴納 (Liam Delap) 的球會表示，該名英格蘭年青射手有意加盟車路士，唔會轉投其他隊伍。

據報曼聯、紐卡素、愛華頓、諾定咸森林、AC米蘭以及祖雲達斯都被通知戴納將會「上車」。

藍戰士只需要繳付戴納的解約條款金額3000萬鎊，再傾妥埋個人條款，就可以簽入呢位22歲前鋒。

戴納喺2024年由曼城以1500萬鎊再加500萬鎊升班附加條件轉投葉士域治。雖然球隊今季表現差勁，最終降班收場，但戴納經常喺甚少供應的情況下，仍能攻入12個英超入球，佔球隊全季36個總入球的三分一，表現相當唔錯。

戴納之所以選擇車路士，毫無疑問由於藍戰士來季可以參加歐聯，再加上球隊日前更取得歐洲協會聯賽盃冠軍，士氣高漲。

戴納係英格蘭球壇其中一位最耀眼新星，所以佢決定加盟車路士，肯定令到車仔全軍上下信心大增。

領隊馬利斯卡 (Enzo Maresca) 今季只得尼高拉積遜 (Nicolas Jackson) 一位9號位中鋒球員，所以戴納加盟將可以加強球隊攻力，以及整體實力。

另外，車路士陣中亦只有高爾彭馬 (Cole Palmer) 入了15球，比戴納 取得更多英超入球。

最後，解約條款金額只係3000萬鎊，藍戰士絕對俾得起，考慮到戴納既年輕，又當打，日後理應可以提出更高轉會費，呢單生意絕對有賺。