解讀 | 歐聯八強前瞻：阿仙奴 對 皇家馬德里

原來阿仙奴喺往績方面，兩次正式比賽對賽皇家馬德里都能夠保持不敗。兵工廠喺2005-06歐聯十六強階段，兩回合合計以1比0淘汰皇馬，不過當年躋身決賽後不敵巴塞隆拿。

相信阿仙奴領隊阿迪達較為希望對賽皇馬，並唔係另一馬德里市球會馬德里體育會，事關馬體會防守嚴密，而槍手今季往往都未能攻破一啲主守嘅球隊，對賽皇馬反而可能令阿仙奴有更多空間發揮，不過由於今季前線傷兵滿營，中場嘅美連奴替工擔任前鋒又表現平平，所以導致球隊今季製造入球機會嘅整體表現都未如理想。

最令人擔憂嘅係中堅加比爾因傷提早收咧，令後防中路出現空缺。幸好右翼薩卡同右閘賓韋治經已復出，將夥拍進攻中場奧迪加特組成近年非常強勁嘅右路鐵三角。

阿仙奴防守表現唔錯，今季平均每場聯賽只錄得0.79個非十二碼失球，為歐洲四大聯賽位列第三最好成績，但係皇家馬德里今季多次以令人難以預測、以及相當即興嘅進攻踢法為佢哋帶嚟多場勝利。前線嘅速度，再加上中場嘅比寧咸同華維迪嘅強大支援，令佢哋無堅不摧。

領隊安察洛堤亦都俾好大嘅自由度一眾進攻球員發揮，任由佢哋互換位置，組織攻勢，或者派出多人強攻對方危險位置等等。呢支銀河艦隊亦都係以呢種踢法淘汰曼城，安巴比同雲尼素斯都鍾意喺左路發難殺入對方禁區，而比寧咸亦樂意喺中場左路位置作出支援，佢既可以將皮球送到遠柱位置俾隊友攻門，自己亦可以後上禁區搵食。

不過皇馬今季後防表現認真麻麻，佢哋最近喺國王盃賽事，以4比4同西甲入球數字第四最差球隊皇家蘇斯達打成平手。安巴比嘅加盟令到皇馬前場壓迫威力減低。今季亦曾經以0比4同2比5大敗於巴塞隆拿腳下，對賽強隊時總係少咗人手，又或者唔夠齊心向對手施壓。

預計阿仙奴喺呢個對碰中可以憑著死球攻勢取得甜頭，但係想晉級嘅話，防守方面就要做得更加好，因為皇家馬德里嘅進攻火力十分強勁。