陳康堤簽約華納 3年前唱歌片段翻hit 網友評呢點似足Daddy陳奕迅

陳奕迅同徐濠縈嘅女兒陳康堤轉眼經已大個女，今年20歲嘅康堤簽約華納唱片 ，成為陳蕾、洪嘉豪、MC張天賦嘅師妹，並將於今年出道。華納唱片回應有關傳聞時確認「康堤加入咗Warner Family，關於歌曲部份我們會稍後公布」。

有指身為藝人嘅Eason同阿徐雖然唔想囡囡包包入行，但因為康堤對音樂興趣濃厚，結果都轉為支持。Eason前年推出嘅歌曲《盲婚啞嫁》最後一段有把女聲和音，根據MV嘅credit，首歌嘅和音係由Eason同BAO包辦。咁啱Eason同徐濠縈嘅愛女康堤嘅乳名又係叫「包包」（同BAO同音），唔難聯想到呢把女聲就係康堤！過去Eason夫婦都收得個女好埋，社交平台甚少見到包包嘅相同片，咁到底康堤唱歌有冇daddy咁犀利？

陳康堤出道消息傳出後，小紅書有網民post出一段聲稱係康堤3年前嘅演出片段，佢選唱盧廣仲嘅《我愛你》。片中康堤著住露肩連身高叉牛仔裙襯皮靴，甚有型格，相信潮人媽咪徐濠縈有份幫眼。盧廣仲嘅《我愛你》出名難唱，不過片段只係聽到歌曲尾段ad lib部份，康堤唱起來有板有眼但未夠放。有網民覺得康堤五官似足媽咪，而台風律動就甚有Daddy陳奕迅嘅神韻，相信有更多舞台經驗之後，康堤可以唱得更投入。