香港最長嘅鐵路屯馬線噚日正式開通，一班地鐵迷衝去搭頭班車，同時亦吸引大批市民到場見證開通一刻。唔少傳媒都有訪問市民感受，當中無綫新聞記者訪問咗一名十歲嘅羅小朋友，佢興奮到幫屯馬線開通創作咗句歌詞，配上綠袖子旋律，鏡頭前唱出「屯馬開通真的很興奮」，結果該片段就喺社交網站瘋傳，成為各大討論區熱門話題。

另外，片段更被網民放上YouTube，一晚內點擊率更高達6.6萬人次，唔夠一日已經差唔多十萬點擊，呢個點擊率真係勁過唔少藝人新歌首日點擊率，甚至連最近被封為「國民初戀」嘅《聲夢傳奇》參賽者姚焯菲（Chantel），佢嘅飲水影片上載6日累積7萬收看次數。有網友留言話「我成個腦都係呢句」、「網民表示羅生嘅歌藝可以參加《聲夢傳奇》」、「簡直比得上國民初戀」、「唱得好過周柏豪，TVB快啲簽佢返去，捧紅佢」及「香港樂壇真係欠你一個交代」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！