關於奧斯卡2024 花絮︳Emma Stone晚裝爆拉鏈因為佢？ John Cena全裸頒獎大曬人魚線
－頒獎禮比往年提早喺晚上7點（美東時間）舉行，過程盡量爽快但亦冇幾多亮點。全晚高潮之一可能係Ryan Gosling演唱入圍最佳電影原創歌曲I’m Just Ken嘅部份，雖然Ryan Gosling唔係歌手，但佢嘅演出帶到全場起立。Ryan亦都落台同《Barbie芭比》導演Greta Gerwig及女主角Margot Robbie齊齊玩，而片中另一個Ken劉思慕仲係參與呢個演出嘅舞者之一，好落力。
－Emma Stone身穿出自LV嘅tube dress晚裝，成功再奪影后。不過上台致感言時佢自爆晚裝背後拉鏈爆開，仲話係Ryan Gosling唱I’m Just Ken落台同佢玩嘅時候整爆，叫大家唔好留意。Emma Stone首次做影后，就係憑同Ryan Gosling合演嘅La La Land，兩個人friend之餘仲好有緣。
－頒發最佳服裝設計前，司儀Jimmy Kimmel提到1974年頒發呢個獎時，攝影師Robert Opel突然全裸亂入奧斯卡台上，成為頒獎禮史上最意外場面之一。而今晚喺台上，負責頒獎嘅John Cena亦向呢個場面致敬，以全裸姿態喺台上介紹入圍者，只係以一個得獎結果信封遮住重要部份，露出深邃人魚線，正！冇著衫嘅John Cena仲要話「服裝真係好重要」，引來哄堂大笑。
－獲最佳男配角嘅Ironman羅拔唐尼(Robert Downey Jr.)年少得志，但年青時因濫藥而多次被捕，今年終於憑《奧本海默》奪得最佳男配角。”Ironman”得獎時自嘲要感謝自己嘅不愉快童年，並多謝太太，認為她是「獸醫」，用愛將佢呢隻動物拉回正軌。羅拔唐尼感言中提到為佢工作多年嘅律師，因為以前對方好多時都要幫佢申請保釋！
－頒發全場大獎最佳電影嘅嘉賓係影帝阿爾柏仙奴Al Pacino，過往慣例係講完開場白就播片介紹十套入圍電影，點知阿爾柏仙奴跳過播片嗰part，直接打開寫有獎項得主嘅信封，讀出得獎電影係《奧本海默》。畫面所見大會攝影師似乎未準備好，拍住《奧》導演嘅時候個畫面好搖！現場一片笑聲，可能因為早完show有得早收工去party！
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
