炎明熹傳簽新公司進軍內地 新碟搵李克勤做監製？

勝出TVB《聲夢傳奇》而入行嘅炎明熹，有傳因為唔續約而被大台雪足一年，工作雖然清零但反而可以專心學業，Gigi仲喺IG post咗做義工照顧被遺棄小狗嘅相，生活依然好充實好青春。

今日有傳炎明熹同TVB已經完約，並指參加《聲生不息》而打開內地市場嘅Gigi同內地娛樂公司簽約，將會開發內地及亞洲市場，實行同同樣二十出道就打響名堂嘅鄧紫棋睇齊。報導指新公司開出三大條件氹掂Gigi，分別係可以選擇唔拍劇或者參加綜藝，主力音樂發展；而且歌曲版權由藝人擁有，唔怕之前G.E.M同舊東家咁有糾紛。最後一樣就係俾足budget做新唱片，金額高達8位數！

據知炎明熹嘅新唱片正在籌備中，更有傳Gigi搵到《聲夢》時嘅老師李克勤出任製作人，音樂更加由美國歌手John Legend班底負責，填詞就邀得陳少琪、周耀輝執筆。

不過喺TVB官網，炎明熹嘅藝人檔案頁面仍未刪走，並且有TVB聯絡人電郵地址以接洽工作。但係喺Gigi嘅IG，接洽工作嘅聯絡電郵又並非TVB嘅經理人。咁到底炎明熹而家仲係咪TVB藝人？可能係，遲啲就難講嘞。