林芊妤（Coffee）早前宣布懷上二胎，不過透露產檢結果顯示胎兒可能有「13號染色體異常」（帕陶氏症），伴隨多重心理缺陷，例如智力不足、心臟缺陷、耳畸形等問題，令佢極為擔心，亦決定接受進一步檢查。日前，懷孕5個月嘅Coffee拍片公開抽羊水過程及最終結果。

Coffee表示早前進行Safe T21抽血，T13結果呈陽性，數值比之前有輕微上升，但醫生建議佢考慮再進行羊膜穿刺檢查，以獲得更準確嘅結果。Coffee當晚就決定接受羊膜穿刺，由於佢本身動作幅度較大，容易用力帶動腹肌，加上當時身體抱恙，出現穿羊水情況，被醫生叮囑佢必須臥床休養，經過一星期卧床休息後，Coffee嘅羊水量恢復正常，亦可以慢慢活動。

進行羊膜穿刺數日後，Coffee嘅快速測試結果顯示T13冇問題，不過醫生提醒較細微嘅問題仍需等待詳細報告先可以確認。Coffee表示，兩星期後嘅詳細報告顯示胎兒嘅基因冇問題，令其放下心頭大石，指懷孕5個月以來心情如像坐過山車一樣起伏不定，不過就保持平常心，認為呢個係上天嘅安排，令佢有機會向大家分享呢個經歷，幫助遇到類似情況嘅媽媽。Coffee又喺社交平台感謝觀眾一直鼓勵佢：「最近不論在街上或網上也一直收到大家的關心和慰問，太太太感動了！謝謝你們對我的所有加油，也知道大家是真的很擔心我，希望這影片也能給驗血報告有問題的媽媽一點力量」唔少網民都留言祝福：「知道你report無事個刻，竟然喊左出黎。做媽咪真係一聽到人講懷孕既野，真係好易感動。祝福你同bb」、「善良嘅人，一定會無事，加油coffee」、「聽到你無事就好啦」、「記住好好enjoy 餘下的孕期，做個開開心心的孕媽媽。」、「運動片唔需要太急，我哋會乖乖咁樣等你！」、「雖然我不是母親，但你真係好叻！小心保重身體，祝福你及波波都健健康康！」等等。