爆張國榮寸周星馳顧住食鮑 袋800萬遲埋位
【太陽報專訊】經典作《家有囍事》復修加長版最近推出，導演高志森大爆當年用300萬利誘張國榮（哥哥）「復出」接《家》片，事後卻「一步一驚心」！身為監製的黃百鳴則難忘哥哥代為出面，成功游說張曼玉以導彈造型上陣！文：影視組
哥哥當年移居加拿大，在高志森極力游說下出山接拍《家》片，該片最近推出復修加長版再度上映。有指當年哥哥的片酬比周星馳低一半，高志森昨日大爆：「原本係黃百鳴、林子祥拍哥哥，但林子祥因家事辭演，黃百鳴用800萬請周星馳接棒，佢話要用300萬以下游說到哥哥，而哥哥最終收295萬。當我知道兩位巨星片酬相差咁遠，都驚畀哥哥詐型，但佢一直都冇，去到煞科嗰日周星馳掛住食鮑魚未埋位，佢先講咗一句：『800萬仲未埋位呀！』」
揸槍戲重見天日
當年為配合韓國市場需要，哥哥拍攝了一場揸槍戲，該幕從未在港曝光，在復修加長版內卻「得見天日」，高志森說：「我都係幾日之前先第一次睇呢場戲，當年係動作導演拍嘅，我因為發生咗『搶菲林事件』，喺3名警察陪同下日以繼夜咁剪片。嗰日入戲院睇復修加長版，哥哥同毛舜筠嘅化學作用令觀眾笑到停唔到，反應比當年更甚，佢嘅演出絕對唔止值295萬！」
冧掂曼玉放「飛彈」
黃百鳴亦難忘哥哥當年仗義幫忙：「主角張曼玉有個愛美神導彈造型，佢去到現場唔肯着戲服，哥哥見到就同我講：『等我搞掂佢啦！』咁先至擺平咗件事。」
