衛蘭單身13年 自爆曾有過刻骨銘心一段情：佢宜家結咗婚生埋囡

衛蘭（Janice）、衛詩、王君馨、鍾舒漫、鍾舒祺開設YouTube頻道「Better Together Hong Kong」，於podcast節目大談各自鮮為人知嘅一面。日前播出第二集，五人分享有關約會經歷及對愛情嘅睇法。傾傾吓講到男人臭味嘅問題，鍾舒漫認為：「如果你真係好鍾意嗰個人嘅時候，如果佢有啲臭狐都OK啊」，眾人表示接受唔到；衛蘭則大爆以前鍾意過一個男仔成日都口臭：「我同佢講，佢仲要唔認，佢覺得我妄想」，聽到其他人哈哈大笑。

眾人又講到有冇一段好刻骨銘心嘅愛情，會好想再畀多次機會個男仔，單身咗十三年嘅衛蘭坦言：「其實有嘅，係我第一個男朋友，佢真係好好，佢對我好好，但嗰時太細個，就唔識得珍惜佢，唔知點解嗰時係覺得一個人太鍾意我嘅時候，我會反而推佢走」續指，10年後有再與對方見面，亦有嘗試大家可唔可以再喺埋一齊，但對方嗰陣時好鍾意夜生活，自己則完結咗夜生活嘅階段：「所以好似大家個生命道路好似好唔夾，所以都無一齊，佢宜家都結咗婚，仲生埋個囡」。衛蘭於其他訪問中提及，縱然自己單身，但都開心，亦表示有人追，係未遇到一個合適對象，只好繼續等待；至於擇偶條件方面，則指唔需要靚仔，但要專一及有共同宗教信仰、理念相同，大家可以溝通到。