現年44歲嘅組合Twins成員鍾欣潼（阿嬌），近年定居北京及轉戰內地市場發展，人氣仍舊高企。近日佢參與內地綜藝節目《神奇的朋友》拍攝，北京豪宅內部裝潢曝光。

從節目中所見，阿嬌位於北京嘅豪宅目測至少2,000呎，豪宅空間十足而且擁有落地玻璃，採光度十足，而巨大客廳設有特大電視及L型大梳化；另外更有超多潮物擺設。阿嬌將飯廳打造成休閒娛樂區，不過佢就話將會改成麻雀區。至於廚房方面，設備一應俱全，甚至細心地為好友準備私家碗，以便好友們喺佢屋企食飯。阿嬌同時亦公開咗佢嘅衣帽間，空間相當闊落，除咗有大化妝台之外，仲有超多衣物及太陽眼鏡等等，甚至連名牌行李箱都超過十個。

阿嬌一直被指是圈中小富婆，佢喺2003年開始置業，有指阿嬌手持自家公司發展嘅堅尼地城維壹、中半山明慧苑等數個物業，而老闆楊受成亦曾送贈近千萬上海豪宅，保守估佢嘅物業價值逾億元。