【東方日報專訊】多名立法會議員尋日應邀出席一個論壇，討論特首梁振英宣布唔競逐連任嘅問題，但論壇開始咗近五分鐘，公民黨（公文袋）黨魁楊岳橋先姍姍來遲，認真大牌。楊岳橋就解釋話係蕩失路搞到遲到，仲即場道歉添！
數年前曾做「小黨員」到場
楊岳橋喺論壇開始後五分鐘先出現，佢解釋，今次係佢第一次以嘉賓身份到九龍城賈炳達道公園出席該論壇，所以蕩失路，而佢對上一次去同一地點已經係好幾年前，當時只係公文袋嘅「小黨員」。
點解遲大到？佢話係因為的士司機將佢載到賈炳達道而唔係賈炳達道公園，令佢兜咗個大圈，咁啱電話亦因為更新程式而聯絡唔到工作人員，引致大甩轆。不過佢話從政者要承擔責任，話自己責無旁貸，更為遲到道歉，都算係咁喇！
