慶餘年2︳廣東省網民不滿TVB又播內地劇 直tag樂易玲投訴︰再播的話會失去市場

TVB 9點半時段內地劇集《大奉打更人》上周播完，今晚將會接力播出嘅係內地劇集《慶餘年2》。雖然 TVB標榜由《慶餘年2》由《慶》原班人馬打造、微博話題閱讀量超過550億並且加入6大新角色，但係接連2套內地劇喺9點半出街，令網民對此安排有微言。

有喺廣東嘅小紅書用戶接連發文，更直接tag TVB高層樂易玲，表示「相信很多廣東人看TVB就是因為喜歡港劇，麻煩TVB在9點半時段不要再播外購劇了，如果再播的話TVB真的會失去廣東市場了！」。

香港觀眾口味就接觸得多，到底內地觀眾對於喺香港嘅TVB睇到內地劇有咩反應？內地劇定TVB自家製港劇好睇啲？兩邊都有人撐，有留言指「10個睇TVB 10個都唔鍾意睇內地劇，睇內地劇使鬼睇TVB咩」、「我覺得最大問題是外購劇都比TVB自己的劇好看」。有觀眾就將呢期播緊嘅《奪命提示》為例，認為之前播嘅《大奉打更人》雖然係外購，但都好睇過《奪》。更有觀眾建議TVB，與其播外購劇倒不如重播舊劇，但就有意見話以前亞視執笠前都係不停重播舊野……

根據資料，撇除TVB有份嘅合拍劇，2023、24年TVB全年喺黃金時段播過5齣內地外購劇，相比起2021年（1套）及2022年（3套）明顯增加。而今年至今TVB已經播咗3套內地外購劇（《麻辣商驕》、《太陽星辰》、《大奉打更人》）。