袁偉豪憑不死心捱出頭
袁偉豪（Benjamin）於2007年參加「香港先生」奪冠入行，但他其實已是早已活躍於娛樂圈，但因年少氣盛而錯失加入無綫的機會，最終憑着一夥不死心堅持，終於捱出頭，近期備受力捧，正如他所言：「時也命也。」
「校花校草」選舉冠軍出身的Ben不經不覺已入行18年，加入無綫前曾拍過不少電影同廣告，包括維他奶廣告及電影《新古惑仔之少年激鬥篇》等。但他早在1999年與黃宗澤（Bosco）到無綫面試時已獲取錄：「（無綫）叫我入嚟讀訓練班，但我冇讀到，我想响出面闖吓。嗰時同Bosco都係玩得幾埋嘅朋友，佢入咗嚟，我冇入到。」他形容自己當年萬千寵愛，覺得很多事都好像很容易，不懂珍惜和把握。
Ben坦言因當年的工作態度流失過不少機會：「係自己唔識得去維持做嘢嘅狀態。因為以前由有經理人去到冇經理人，跟住拍完一套戲唔知幾時先拍第二套，中間段時間唔知做乜。（當時感到迷茫？）有。我係想做，不過搵唔到機會做，對呢行好有興趣，但唔知邊一樣嘢，所以樣樣試吓，做吓幕後，學吓製作。」
經過幾年時間的沉寂，知道自己仍然喜歡演藝工作的Ben於2007年在朋友的推薦下參加香港先生：「呢啲係時也命也，我又答唔到你，每個人有自己條路。我仲有一夥不死心，一夥唔放棄再堅持自己，希望仲搵到機會嘅心態。」
在無綫輾轉經歷超過八年頭，Ben謂相比以前的他，變得更實際地去工作。他指自己經驗一定有，但自為人較慢熱，所以捱咗幾年才可以放開胸襟，同監製和演員混熟，「認真做嘢但都要有覺得好玩嘅心態先做好件事，唔好吓吓咁緊」。
服裝提供： Seven Friday
