修咸頓贏史雲斯上岸 踢埋西布朗降班

艾拿載斯：愛華頓想爭前四要改變

賽前排第17和18位的修咸頓和史雲斯，上半場多以遠射威脅對方大門，但未算到肉。下半場早段主隊佐敦阿休禁區頂燙射死角，被門將飛身救出。

直至72分鐘修咸頓一次角球攻勢，加比亞甸尼把握門前機會執雞射入，一箭定江山協助球隊贏1︰0完場，全取3分後以36分升上第16位，比第18位的史雲斯多3分，在只餘一場賽事兼比對方多9球得失球優勢下，基本上宣佈護級成功。

同時間「聖人」贏波亦篤定西布朗護級失敗，雖然後者近期先後擊敗曼聯和熱刺取得5戰不敗走勢，但比第17位的安全線差5分之多，角逐英超8季後終要降班英冠。

而輸波的史雲斯尚未絕望，只要第17位的哈特斯菲爾德周三作客車路士輸波，在保持3分差距兼得失球差有優勢下，在周末煞科戰仍然有價講。(Goal.com)