陳奕迅早前喺巡迴演唱會紀錄片中，自爆期間曾經患上焦慮症，更需要食藥治理，引起唔少人對藝人精神健康嘅關注。曾經喺網劇《反黑》飾演「招積」一角嘅張建聲，見到Eason嘅分享後喺社交平台公開自己患上情緒病嘅經歷。

張建聲發文透露「幾年前有一段時間情緒出現狀況，嚴重程度令我覺得要去看醫生，結果確診為：廣泛性抑鬱症、焦慮症、人格解離症。」，同時公開2022年求診後獲發嘅的醫生紙，以作證明。幸而張建聲經過幾年治療後，已經治好了焦慮症及人格解離症，只剩下抑鬱症。佢同網友分享時叮囑大家「這是一般都市人都會有機會常有的精神病症，有病求醫，千萬不要拖症。」

過去張建聲為角色試過增磅又減磅，但有情緒病後，佢話身形難以控制。「用藥的其中兩個副作用，就是會令身體代謝減慢，以前輕鬆減磅，但現在要付出三倍力和時間進行。另外就是扁桃腺會腫大， 導致非常臃腫，下顎線亦沒有了。所以其實我想表達的是『當你取笑別人外貌的時候，你知道他背後的故事嗎？你知道他正在受苦中嗎？』你可以不愛，但請不要傷害」。

身型以外，拍攝工作遇上病發，張建聲都只可以自行靠藥物幫手。「我不允許演出時失準，亦不想拖累劇組，而當拍攝途中病發時，亦只好食藥並且躲到一旁令自己冷靜一下，出來的時候繼續笑面迎人。」，同時貼上網上有關情緒病嘅資料。唔少網民睇完分享之後，都同張建聲留言打氣。