正義女神︳26歲劉倬昕反串演14歲少年犯獨腳戲搶鏡 原來係港大犯罪學碩士兼運動健將
Yahoo娛樂圈
更新時間
早前TVB發出盈喜，預計2025年財年扭轉多年劣勢錄得轉虧為盈，並點名受惠於劇集《新聞女王 2》嘅廣告及贊助。《新聞女王》女主角佘詩曼被指靠一人之力終止TVB七年半虧損，佢嘅新劇《正義女神》尋晚首播當然成為焦點。《正》劇中佘詩曼飾演法官，要處理各式各樣案件，打頭陣嘅係一宗天台遊樂場發生嘅悲劇，一名8歲男童墮樓身亡，年僅14歲、殿堂級大狀高淑樺（陳煒飾）之子高成彬被控謀殺，案件轟動全城。
飾演高成彬嘅係TVB 2021年藝員訓練班畢業生劉倬昕，佢以26歲之齡反串飾演14歲少年，對新人而言十分考功夫。但係劉倬昕嘅庭上作供戲演到聲淚俱下，令人刮目相看，睇埋劉倬昕背景，原來大有來頭。
廣告
劉倬昕7歲時被判定係資優生，中學就讀名校拔萃女書院，後來升讀香港大學，並以一級榮譽完成語言學及性別研究課程，再取得犯罪學碩士，更將於今年9月修讀教育課程。讀書勁之外，劉倬昕亦曾參與龍舟、田徑等賽事，甚至代表香港出賽。
唔少藝人都係因為「陪朋友」參加比賽而入行，劉倬昕正正因為陪朋友去TVB面試而被取錄，入行後曾於J2節目《我要瞓鬥》中成功挑戰60小時不眠不休，勇奪冠軍並贏得10萬元獎金。劉倬昕仲參加過《福祿壽訓練學院》，以人頭扮人肉籃球，十分搏命。
廣告
