黃建東內地拍劇左耳突發性失聰 急返港求診醫藥費好揦脷

最近黃建東（東東）身在深圳拍攝TVB重頭劇《黑色月光》，所以要中港兩邊走，直至日前先完成深圳部分，返香港稍作休息，過年後再繼續喺香港完成拍攝工作。返咗香港嘅東東，原來去咗睇醫生，佢喺IG出Story指自己患上突發性左耳失聰。

黃建東喺IG Story上載幾包藥物及求診收據嘅照片：並留言話：「啱啱睇完耳鼻喉專科，因為左耳聽唔到嘢，原來鼻竇炎導致中耳炎導致耳積水，盛惠$4000 嚇咗一大跳，相士話我漏財真係有原因。」

佢喺接受傳媒訪問時表示喺1月份拍緊《黑色月光》時，當時劇組亦有唔少人病咗，不過佢作為演員冇得全程戴住口罩，所以唔小心惹到感冒。有一日佢喺酒店房發燒發冷，不過仲要應付全日嘅拍攝工作，所以佢都直認辛苦。佢有返香港睇醫生，食藥後情況有好轉，不過依然有流鼻涕同咳。正當佢以為病徵會慢慢減退，點知兩至三日前左耳突然失聰，好似潛咗落水底咁，搞到佢好驚會影響聽覺。不過佢喺深圳拍緊劇，唔可以行開，去到最後一至兩組戲時要靠右邊聽嘢，除咗好辛苦之外，佢好怕聽唔到對手講對白而甩對白，但又唔敢話俾人知。

睇完專科醫生後，東東指自己係感冒菌入耳，導致中耳炎，現時已經食緊藥，但聽力仍未回復，左耳聽嘢有回音，好似長期喺水底。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！