全紅嬋承認曾因發育致體重失控 一度有意退役 求網民「不要再罵我了」
更新時間
國家女子跳水隊金牌選手全紅嬋喺2年前嘅巴黎奧運，成功衛冕女子十米高台跳水金牌，僅以17歲之齡就成為中國隊奪得三項金牌嘅最年輕選手，打破跳水皇后伏明霞紀錄。不過去年全紅嬋以傷患為由，宣布退出全國跳水冠軍賽及新加坡游泳世錦賽。全紅嬋「復操」後，網民從流出嘅訓練影片睇見「嬋寶」似乎身型比前圓潤，都好擔心佢嘅狀態，後來全紅嬋再出post，佢身型面型都瘦下來，大家先至放心晒，甚至為佢漸漸散發嘅少女味而感到驚喜。
全紅嬋早前接受內地傳媒專訪，罕有回應關於體重嘅問題。今年19歲嘅「嬋寶」自爆喺2年前巴黎奧運後首次有生理周期，正式步入發育時期「長大成人」後，卻出現身型同體重都難以維持嘅狀況。全紅嬋直情話當時係食嘢就長肉，佢為減磅捱餓甚至一日只係食一餐，但係連飲水都會重。外界同網民對身型嘅「關注」，全紅嬋試過著長袖衫褲遮肉，照鏡更令佢對自我形象不滿，更莫講話面對鏡頭。對外表失去信心之外，全紅嬋連過去完成過嘅跳水動作都感到害怕，一度有退役念頭，但最終決定堅持。
廣告
訪問中全紅嬋多次哽咽落淚，例如被問到點解鍾意烏龜公仔時，佢解釋「我希望我的時間多一點……我不想那麼快長大，我想做回以前的自己」，講嘅時候已經眼濕濕。全紅嬋身為公眾人物，難免受到負評，但佢居然為hater搵原因，不過都希望大家「口下留情」，「希望不要再罵我了，然後不要罵我家裡人，還有不要罵我朋友」。
