【東方日報專訊】早前泛民立法會議員與中央領導人會面時，當面批評特首梁掁英（CY）施政有問題。現任行政會議成員羅范椒芬（羅范），當年曾出任CY競選辦主任，尋日出席一個活動時不但完全冇話「挺梁」，又重申自己唔會再幫手助選特首，更表明希望施政報告加入全面反思嘅部分添！
羅范話政府唔能夠一味唱好，國內工作報告講自己嘅成就，但都有一大段講國家仲有好多不足嘅地方，再講下一年重點擺喺邊，自己就好欣賞呢種表達方式，但係香港嘅施政報告咁多年來，都只係報告做咗啲乜嘢，就冇一個全面反思，自己喺乜嘢地方仲需要努力，佢希望施政報告要有呢個改變喎。
「年紀大唔做辛苦嘢」
佢又認為國務院港澳辦主任王光亞當年提到特首要符合三個條件，包括要愛國愛港、有能力，同埋有社會支持，至今仍然合用。至於CY係咪唔符合「社會支持」，佢話要整體去睇，亦要睇有乜嘢人參選，被問到係咪支持CY連任，佢就話等有人宣布參選先會講會否支持邊個，自己會支持最合適嘅人。
講咗咁耐，佢完全冇講會支持CY連任，更加講明唔會幫任何人助選，因為「年紀大，唔再去做啲咁辛苦嘅嘢！」甚至連會唔會再做行會成員都話唔知，就算有人邀請都要睇情形喎！
不過，佢話港人唔可以成日淨係找政府嘅不足，做咗好嘢都要讚佢，唔可以針對佢或者淨係去執政府錯處，又指中央領導人都話要大家出謀獻策，幫吓政府一齊去做好香港，否則大家一齊埋單。咁佢認為領導人係咪挺梁？佢就話自己當時唔在場，「挺唔挺，呢啲係你哋自己演繹之嘛，佢冇講到呀」。
CY：未聞有人欲參選
被問到依家CY民望下跌，佢就話民望有時好難講，有時做得嘢多，成日被人寫衰點會好，要客觀持平去睇，唔做嘢，民望就梗係最高，但係做親任何嘢，都難免會得罪人，好多問題要全社會解決，而呢屆政府非常努力做嘢，但係好事不出門。
另外，CY尋日接受電視台專訪時，承認香港距離「安居」呢二字路途太遠，但已上軌道，往後仍有很多工作要做，而興建公屋亦遇到地區阻力。佢又話未決定係咪會爭取連任，亦未聽到有人有意參選。
