何超儀承認獲何鴻燊遺產金額少過家姐細佬 聽到「有冇100億」俾出呢個反應

賭王何鴻燊2020年離世後，外界一直關注其遺產分配情況。何家二房嘅何超儀（Josie)早前到台灣宣傳自己監製及主演嘅電影《怨泊》，並接受當地命理清談節目《命運好好玩》訪問，罕有提及獲分遺產多少。

何超儀直言獲分配嘅資產少過家姐細佬，不過佢認為係合理，因為自己冇幫手打理家族生意，而家人都放咗青春喺工作之上，值得攞多啲。何超儀仲話自己算係「倒楣」，因為一直投資拍電影，唔應該分咁多俾佢。

主持人何篤霖嘗試chok何超儀獲分幾多財產，直接問「你有分到100億港幣？」，Josie笑而不答再回應「什麼？」，何篤霖再追問「200億港幣？」，何超儀就直接話「沒有」。何篤霖再三套料問分到嘅身家夠拍幾多套戲，Josie就轉話題指大家姐（何超瓊）曾經喺楊紫瓊面前批評佢出品嘅電影套套都蝕錢。何超儀認同家姐講法，認為自己要計算準確啲。