孫慧雪大肚開工被拖奶粉錢斥無良

藝人孫慧雪（雪雪）去年與圈外男友羅天彥拉埋天窗，今年7月誕下愛兒「小饅頭」Riley，一家三口相當幸福！不過雪雪昨日在社交網發文指懷孕期間接了工作，但逾半年至今仍未收到酬勞，疑被拖數。

接頭人「已讀不回」潛水

雪雪上載數張WhatsApp對話截圖，並說：「咁樣係唔係已經走咗我數？其實每次工作我都好盡力同好爽快地完成，然而每次追數都好似我要求人咁……點解要求出糧好似我做錯咁？呢單仲要大住肚來做，我覺得咁樣都走數，真係好無良，我好嬲呀！」獲不少同行留言鼓勵。

雪雪接受本報訪問時表示被拖糧五位數字，起初對方職員仍有禮地道歉，但最近卻「已讀不回」。她說：「我係自己接Job，有時大家講個信字，佢哋又有間公司喺度，我就諗住做完個工作先收錢，之前同佢哋合作過，平均拖糧半年，但今次直頭唔覆，我打定輸數啦！最無奈係今次工作嗰陣我係佗緊BB，諗住努力啲搵錢，所以先咁失望！」雪雪表示經過今次事件後會加倍小心，事先會跟對方簽訂文件，亦希望不會再有同行遭殃。