上班族們平時唔係帶飯就出街食，今次呢篇文章，就專為冇時間準備飯盒但又想食得健康啲嘅朋友仔而設。開飯仔搜羅咗幾間位於中環、鰂魚涌、尖沙咀同觀塘呢啲最多人返工區域嘅健康餐廳畀大家，睇啱就bookmark定，下個lunch約埋同事去食咯～

中環新派多國輕食外賣店 AFK

新派多國輕食嘅grab & go外賣品牌，主力供應卷物同飯盒～卷物用米紙做外皮，以唔同國家如歐美、日本等風味為餡料創作靈感，煙燻牛肉卷物用自家製煙燻牛肉、辣根、薯仔沙律等製成，淡淡煙燻香；西班牙八爪魚卷物加入加利西亞八爪魚、小菠菜、蘆筍及薯仔沙律等，好清爽。驚食卷物唔夠飽可以揀飯盒，雖然叫「飯盒」，但其實以椰菜花飯或四式穀飯作底，如招牌30小時慢煮牛胸腩穀飯，用30小時慢煮牛胸腩、燒洋蔥、大啡菇、芥蘭苗等配四式穀飯，軟腍又入味。

大大份Build Your Own便當 饗量

如果想健康又食得飽呢間絕對啱晒你，而且仲有得build our own bowl，夠晒彈性！一份便當有得自選穀物、蔬菜、蛋白質、豆類及醬料等，蛋白質最推介烤雞腿，外脆內嫩又充滿肉汁，而且好大件～蔬菜唔想太清淡，揀醃蘿蔔都唔錯，酸酸甜甜好開胃。醬料方面好似明太子醬、蒜芥末同香醋蜜醬都幾香濃，卡路里又唔高。中環、鰂魚涌同觀塘都有分店。

港島日式營養便當 Karui Bento

有家味道嘅日式便當，佢哋嘅便當以健康輕盈為主，使用少鹽、少油、少糖烹飪方式，令人食得安心～便當有齊豬、牛、雞、魚同素菜等選擇，薯仔牛腩配野菜便當係熱賣款，牛腩軟腍入味，薯仔粉糯，配飯食一流～照燒雞扒飯都唔錯，雞扒好大塊，甜甜鹹鹹夠惹味。味噌比目魚便當魚油幾香，調味簡單更可以突出魚味。

足料夏威夷魚生飯 Poke Go

有時食得健康都可以食到自己鍾意食嘅嘢㗎～好似近年好受歡迎嘅poke bowl，通常以魚生為主，啱晒鍾情日本嘢嘅香港人。佢哋嘅bowl選擇有好多又夠足料，如808 bowl，有齊吞拿魚、壽司飯、沙律菜、和式青蔥、枝仁豆、三文魚籽、雜菌香菇、山葵乳酪醬、芝麻及木魚絲，好有日式風味。ONO set都唔錯，三文魚配上青瓜、蛋絲、蟹棒沙律，口感豐富，糙米飯底有咬口，三文魚份量好多，抵食！深水埗、尖沙咀同灣仔都有分店，好方便呢。

觀塘健康飯堂 Mela Food Express

位於觀塘區嘅餐廳，主打多菜少肉嘅健康午餐，如薄燒美國牛肉、鹽燒鯖魚、薄燒無激素豬肉、慢煮無激素雞胸肉及香草烤雞腿等，全部都可以自選4款配菜，包括烤南瓜、椰菜花藜麥飯、日式薯仔沙律及燴紫椰菜等，夠晒健康～唔想食飯另外仲有墨西哥卷及夾餅選擇，吞拿魚，碎蛋墨西哥卷，蛋味香濃，配埋大量蔬菜食口感好好～

文: Yanica