94歲黃夏蕙闊太變基層 住過渡房屋拎4千蚊長生津 舊愛離世頓失依靠

94歲嘅夏蕙姨黃夏蕙，年輕時同已婚律師胡百全相戀，更在無名份之下為愛人誕下6個仔女，胡亦照顧黃夏蕙生活多年。外界一直以為夏蕙姨過嘅係闊太生活，但原來2008年胡百全離世後，夏蕙姨變做基層，要靠長者生活津貼度日，而且寄人籬下，到近期先至獲編配入住過渡房屋。

有周刊報導指，當年黃夏蕙同胡百全生活期間，每個月有30萬生活費，仲有7位工人同司機，住喺跑馬地以至中半山豪宅，的確係上等人生活。黃夏蕙聲稱胡百全喺1980年同佢立契約，容許夏蕙姨喺胡父胡禧堂嘅遺產信託基金收取利息，二人嘅6名仔女可以繼承胡家遺產。

胡百全喺2008年逝世，黃夏蕙嘅生活開始出現逆轉，失去依靠之餘又冇錢就胡家信託基金分配打官司，更被損友騙去西貢豪宅業權。夏蕙姨因此要寄居朋友屋企，甚至試過瞓「骨場」。

黃夏蕙於是申請入住公營房屋，輪候5年到近日獲安排入住新界新田嘅組裝式過渡房屋，單位面積約160呎，同往日住豪宅好大落差。同時夏蕙姨領取每月4千元左右嘅長者生活津貼糊口，過住基層式生活。黃夏蕙1983年同賽車手潘炳烈結婚，現時潘於美國生活，雖然黃夏蕙近年曾經移居當地，但生活咗2年就返香港。夏蕙姨直言同潘炳烈各有各生活，亦唔多想向仔女求助。夏蕙姨早前申請法援，希望透過法庭取得胡家基金嘅一部份，不過法援以黃夏蕙並非胡禧堂基金的受益人，加上超過承諾契約追討期，因此不獲受理。

報導出街後，夏蕙姨喺facebook發文抒發感受。「我今年活到94歲，假如您同我講人生苦短，我都只會老生常談咁樣安慰佢，因為我係一個過來人，喺我人生中，經歷過幾段最艱苦嘅日子，年輕時遇到愛情選擇嘅困惑，中年時喪偶嘅悲痛，老年時，形象上有所改變，多謝經理人小肥豬嘅幫忙。不過，自己硬頸，同唔想影響兒女嘅生活，唔會主動問佢哋攞生活費，成個過程聽落去好似好負面，往往人生就係忽略苦盡甘來，困難中找尋人生活着嘅方法，呢個就係做人真正意義的動力！」。