【東方日報專訊】立會新丁朱凱廸（Eddie）前排踢爆橫洲事件成為風頭躉，但佢又怕痕又怕痛，既怕得失激進派選民，又怕畀人標籤做港獨分子。早排青年新政游蕙禎與梁頌恆喺立法會宣誓發表「辱華論」，過咗幾日Eddie就漏夜飛咗去倫敦，追查立法會主席梁君彥放棄英國國籍嘅疑點，暫時避開辱華論呢個惹火議題，唔知係咪因為中央可能出手遏止港獨，Eddie尋日就急急腳同港獨劃清界線。
指「自決派」與「港獨派」有別
Eddie尋日喺電台節目提到，好多人都搞唔清「自決派」同「港獨派」有乜嘢分別，佢解釋，「自決派」從來都唔係要否定自己係中國人嘅身份，亦都唔係要創建香港民族，又指自己唔係要激發種族矛盾。
佢又話「自決派」嘅目標係要令香港人，包括新移民，都渴望有民主，之後社會就可以發起持續抗爭。但佢坦言依家最大問題係要點樣做到自決，仲難過爭取雙普選。咁講法，係咪暗示自決本身就冇市場？
近日不斷有消息指中央可能短期內會打擊港獨，Eddie喺呢個時候重申自己係自決派，而非港獨派，真係咁巧合？抑或佢係睇到勢色唔對，所以急急腳同港獨劃清界線，以免被拖落水呀！
卓妮
